Deċennju Diġitali - Proġetti multinazzjonali

Il-proġetti multinazzjonali għandhom jiġbru flimkien l-investimenti mir-riżorsi ta’ finanzjament tal-UE, inkluż mill-Faċilità għall-Irkupru u r-Reżiljenza, u mir-riżorsi nazzjonali. Entitajiet pubbliċi u privati oħra jistgħu jinvestu fil-proġetti fejn xieraq. 

Il-proġetti multinazzjonali jenħtieġ li jiġu implimentati b'mod koordinat, f'kooperazzjoni mill-qrib bejn il-Kummissjoni u l-Istati Membri. 

Fl-Annesstad-Deċiżjonital-2030 dwar il-Programm ta’ Politika dwar id-Deċennju Diġitali, il-Kummissjoni identifikat lista inizjali ta’ oqsma għal proġetti multinazzjonali u tista’ taġġorna l-lista, jekk ikun meħtieġ, abbażi tal-monitoraġġ tal-progress annwali:

• Infrastruttura u Servizzi Komuni Ewropej tad-Data
• L-UE tingħata l-ġenerazzjoni li jmiss ta’ proċessuri fdati b’konsum baxx tal-enerġija
• It-tnedija ta’ kurituri pan-Ewropej tal-5G
• L-akkwist ta’ superkompjuters u kompjuters kwantistiċi
• L-iżvilupp u l-użu ta’ infrastrutturi ta’ komunikazzjoni ultrasikuri kwantistiċi u bbażati fl-ispazju
• L-iskjerament ta’ network ta’ Ċentri tal-Operazzjonijiet tas-Sigurtà
• Hubs ta' Innovazzjoni Diġitali Ewropej
• Sħubijiet ta’ teknoloġija avvanzata għall-ħiliet diġitali u l-edukazzjoni speċjalizzata
• Infrastruttura Ewropea tas-Servizzi tal-Blockchain

Il-proġetti multinazzjonali għandu jkollhom l-għan li jiksbu wieħed jew aktar mill-għanijiet speċifiċi li ġejjin:

(a) it-titjib tal-kooperazzjoni bejn l-Unjoni u l-Istati Membri u fost l-Istati Membri fil-kisba tal-objettivi ġenerali;

(b) it-tisħiħ tal-eċċellenza teknoloġika, it-tmexxija, l-innovazzjoni u l-kompetittività industrijali tal-Unjoni fit-teknoloġiji kritiċi, il-kombinazzjonijiet tat-teknoloġija komplementari, u l-prodotti, l-infrastruttura u s-servizzi diġitali li huma essenzjali għall-irkupru u t-tkabbir ekonomiku u għas-sigurtà u s-sikurezza tal-individwi;

(c) l-indirizzar tal-vulnerabbiltajiet u d-dipendenzi strateġiċi tal-Unjoni tul il-ktajjen tal-provvista diġitali sabiex tissaħħaħ ir-reżiljenza tagħhom;

(d) iż-żieda fid-disponibbiltà, u l-promozzjoni tal-aħjar użu, ta’ soluzzjonijiet diġitali sikuri f’oqsma ta’ interess pubbliku u fis-settur privat filwaqt li jiġu osservati l-prinċipji tan-newtralità teknoloġika;

(e) il-kontribut għal trasformazzjoni diġitali inklużiva u sostenibbli tal-ekonomija u tas-soċjetà li tkun ta' benefiċċju għaċ-ċittadini u n-negozji kollha, b'mod partikolari l-SMEs, madwar l-Unjoni;

(f) il-promozzjoni tal-ħiliet diġitali għaċ-ċittadini permezz tal-edukazzjoni, it-taħriġ u t-tagħlim tul il-ħajja, b’enfasi fuq it-trawwim ta’ parteċipazzjoni bbilanċjata bejn il-ġeneri fl-edukazzjoni u fl-opportunitajiet ta’ karriera.

Il-Kummissjoni tgħin lill-Istati Membri jidentifikaw, jistabbilixxu u jimplimentaw proġetti multinazzjonali. Biex jiġi stabbilit proġett multinazzjonali fejn ma jkun hemm l-ebda strument legali ieħor, il-programm ta’ politika tad-Deċennju Diġitali introduċa struttura legali ġdida, il-Konsorzju Ewropew għall-Infrastruttura Diġitali (EDIC), li jgħin biex jitħaffu u jiġu ssimplifikati l-istabbiliment u l-implimentazzjoni ta’ proġett multinazzjonali partikolari. 

Kull sena, il-Kummissjoni tippubblika rapport dwar is-sitwazzjoni attwali tad-Deċennju Diġitali u l-progress tal-proġetti multinazzjonali. 

Aqra l-aġġornament tal-2025 dwar Proġetti Multinazzjonali (.pdf)